ភ្នំពេញ៖ ជនសង្ស័យ ព្រហ្ម វិចិត្រសុសក្ដា ដែលបេីករថយន្តបុកបុរសម្នាក់ដែលជាកីឡាករវាយសីស្លាប់នៅខណ្ឌទួលគោក ពេលនេះបានចូលខ្លួនសារភាពនៅស្នងការដ្ឋាននគរបាលរាជធានីភ្នំពេញហេីយ ខណៈការចូលខ្លួននេះគឺតែប៉ុន្មានថ្ងៃប៉ុណ្ណោះបន្ទាប់ពីមានបទបញ្ជាពីនាយករដ្ឋមន្ត្រី សម្ដេចធិបតី ហ៊ុន ម៉ាណែត។
បេីតាមស្នងការនគរបាលរាជធានីភ្នំពេញ បន្ទាប់ពីការសាកសួរជនសង្ស័យ នគរបាលនឹងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់។
គួរឱ្យដឹងដែរថា កាលពីថ្ងៃទី១៤ ខែធ្នូ ឆ្នាំ២០២៣ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តម៉ាក Jeep Overland ពាក់ផ្លាកលេខ 2CB-9963 បានបុកជាមួយម៉ូតូមួយគ្រឿង ក្នុងភូមិសាស្រ្ត សង្កាត់បឹងកក់ទី១ ខណ្ឌទួលគោក បង្កឱ្យជនរងគ្រោះឈ្មោះ សៀង គីមហុង ភេទប្រុស ជាអ្នកបើកបរម៉ូតូបាត់បង់ជីវិតនៅកន្លែងកើតហេតុ៕
